Spilverkið í píanói er flóknasti partur þess. Hver nóta samanstendur af fjölmörgum pörtum sem þurfa að virka á ákveðinn hátt til að ánægjulegt sé að spila á píanóið. Þar sem nóturnar eru tæplega 90 er spilverksstilling tímafrekt verkefni.
Vanstillt spilverk veldur því að erfitt er að framkalla tónana eins og fólk vill. Píanóstilling ein og sér snýst aðeins um að breyta spennunni á strengjunum þannig að þeir hljómi rétt. Spilverksstilling er þess vegna annað verk sem þarf að framkvæma sérstaklega.
Stilling á því hvenær hamarinn kúplast frá hreyfingu nótunnar
Spilverk píanóa fara úr stillingu vegna notkunar, en einnig vegna breytinga á hita- og rakastigi. Þau samanstanda af hlutum sem eru aðallega gerðir úr viði, filti, leðri og málmi. Með tímanum aflagast allir þessir hlutir og afstaða þeirra breytist. Píanóið missir þannig hæfileikann til að svara óskum píanistans.
Meðal þess sem vanstillt spilverk getur orsakað:
tvísláttur
erfitt að spila veikt
léleg svörun
og ótalmargt fleira
Næst þegar þú lætur stilla píanóið þitt skaltu því forvitnast um hvort það sé hægt að stilla spilverkið þannig að það svari betur.